தேசபக்தி ....

உலகில் எந்த நாட்டை வேண்டுமானாலும் எடுத்து பாருங்கள்.. அந்த நாட்டின் தேசபக்தி என்பது இன்னொரு நாட்டின் மீதான பகையால் உருவாக்கப்பட்டதாக இருக்காது .. இதில் விதிவிலக்காக இருப்பது இந்தியா, பாகிஸ்தான் போன்ற சில நாடுகள் தான்..

இந்தியா உருவாகும் போது முன்னூறுக்கு மேற்பட்ட சமஸ்தானங்களை சேர்த்து தான் இந்திய ஒன்றியம் உருவானது. அதாவது இந்திய ஒன்றியம் என்பது சேர்க்கப்பட்ட கூட்டம் தான், தானாக சேர்ந்த கூட்டம் அல்ல.

இப்படி ஒன்றுக்கொன்று முரண்பட்ட பல்வேறு இனம், மொழி கலாச்சாரங்களை கொண்ட இந்தியாவை இங்கு தேச பக்தியில் ஒருங்கிணைக்கும் பல்வேறு நிகழ்வுகளில் பாகிஸ்தான் மீதான பகையும் உதவுகிறது. பாகிஸ்தான் மக்களின் தேச பக்தியும் இப்படியே தான் உருவாக்கப்படுகிறது.

இந்திய - பாகிஸ்தான் பிரிவினையின் போது இந்த பகை உருவாக்கப்பட்டது. இந்த பகை தான் இரு நாடுகளின் தேச பக்தியை இன்று வரை வளர்த்து கொண்டிருக்கிறது ... இதில் குறிப்பிடதக்க அம்சம் எதுவெனில் இரு நாட்டிலும் எதிர் எதிராக பிரிந்து போன இரண்டு மதங்கள் பெருபான்மை சமூகமாக இருப்பது தேசபக்திக்கு இன்னும் கூடுதல் பலம் .

இதனால் தான் 1000 - க்கும் அதிகமான தமிழக மீனவர்கள் இலங்கை அரசால் கொல்லப்பட்ட போது இந்தியாவில் தமிழ்நாட்டை தாண்டி யாரையும் உறுத்தவில்லை .. காரணம் இலங்கையை எதிரி நாடாக பார்க்காமல் அண்டை நாடாக பார்க்கிறான்..

ஒரு வேளை தமிழக மீனவர்களை பாகிஸ்தான் சுட்டிருந்தால் இந்தியா முழுவதும் தமிழக மீனவர்கள் விசயம் கவனம் பெற்றிருக்குமோ என்னவோ?

இங்கு யதார்த்தையோ, பிரச்சனைக்குரிய தீர்வை பற்றியோ பேசினால் அவன் தேசத் துரோகி ஆகிவிடுவான்.. இது இரு நாடுகளுக்கும் பொருந்தும் ..
.
இந்த பகைமை என்பது இந்த இரு நாட்டு அரசியலுக்கும், ஆட்சியாளர்களுக்கும் மிகவும் பயனுள்ளதாய் இருந்து கொண்டு இருக்கிறது ... இங்கு இந்திரா முதல் மோடி வரை ... அங்கு பூட்டோ முதல் இம்ரான்கான் வரை தொடர்கிறது ..

கடந்த வாரம் 40 வீரர்களை இழந்தோம்.. இன்று பதிலடி கொடுத்திருக்கிறோம்.. உயிர் சேதம் குறித்த தகவல் இன்றும் தெரியவில்லை .. தேசம் என்னும் ஒற்றை புள்ளியில் நாம் ஒருங்கிணைந்து நிற்கிறோம்..

ஆனாலும்..... முன்பெல்லாம் நீ தேச விரோதி என மதரீதியாக சொல்லி வந்தவர்கள் தற்போது கட்சி ரீதியாகவும் சொல்ல ஆரம்பித்து விட்டார்கள். அதாவது அரசியலமைப்பின் நிர்வாகத்திற்கும், அரசியல் ஆட்சியாளர்களுக்கும் இடையிலான வித்தியாசத்தை உணராமல் இருக்கிறார்கள்..

அதனால் தான் ஆட்சியாளர்களின் செயல்பாட்டை குறை கூறினால் அவன் தேசத்துரோகி என முத்திரை குத்தப்படுகிறான்..

இங்கு தேசம், தேச பக்தி என்பது மிகவும் சென்சிட்டிவ்வான விசயமாக உருவாக்கப்பட்டுள்ளது... சீனா, அமெரிக்க ஐரோப்பா நாடுகளில் தேசபக்தி என்பது தேச வளர்ச்சியுடன் இணைக்கப்பட்டிருக்கும் .. ஆனால் இங்கு....?

இன்றைய பாகிஸ்தான் பகுதி மீதான தாக்குதல் குறித்து அரசிடமிருந்து உறுதி படுத்தப்பட்ட தகவல்கள் வரும் முன்னே ஊடக செய்திகளை பார்த்தே அனைத்து எதிர்கட்சி தலைவர்களும் இராணுவத்திற்கு வாழ்த்து தெரிவித்தனர்.

ஒரு வேளை ராகூலோ, மம்தாவோ அரசிடமிருந்து உறுதி படுத்தப்பட்ட தகவல்கள் வரும் வரை கருத்து சொல்லாமல் இருந்திருந்தால் இந்நேரம் அவர்கள் தேசத்துரோகியாக ஆக்கப்பட்டிருப்பார்கள் ... அதனால் அத்துணை தலைவர்களும் முண்டியடித்து முன்கூட்டியே கருத்து சொன்னார்கள்..

காரணம் இல்லாமல் இல்லை.. காஷ்மீர் தாக்குதல் நடந்த நாளிலிருந்து இன்று வரை அந்த நிகழ்வை நமது பிரதமர் அதிகமாய் பேசியிருப்பது தேர்தல் பிரச்சார கூட்டங்களில் தான் தவிர... அனைத்து கட்சி கூட்டத்தை கூட்டியோ, அல்லது செய்தியாளர் சந்திப்பிலோ அல்ல..

இதுவரை சுதந்திர இந்தியாவில் மக்கள் மத்தியில் தேசம், தேசபக்தி என்பது கடந்த ஐந்து ஆண்டுகளுக்கு முன்பு வரை தனித்துவமாய்.. உணர்வுப்பூர்வமாய் இருந்து வந்தது.. ஆனால் கடந்த ஐந்து ஆண்டுகளாக அது அரசியலாக்கப்பட்டு யாரு யாருக்கு எவ்வளவு தேசபக்தி என அளவீடு செய்து கொண்டிருக்கிறார்கள்..... அபத்தமாக ... 😰😰